Beth yw Dinas Diwylliant y DU?

Mae Dinas Diwylliant y DU yn gystadleuaeth sy’n cael ei rhedeg gan DCMS Llywodraeth y DU – Adran Ddigidol, Diwylliant, Cyfryngau a Chwaraeon. Rhoddir dynodiad ‘Dinas Diwylliant’ i ddinas yn y Deyrnas Unedig am gyfnod o un flwyddyn galendr, pan fydd y cynigydd llwyddiannus yn cynnal dathliadau diwylliannol trwy adfywio dan arweiniad diwylliant am y flwyddyn. Llwyfannodd Wrecsam ymgyrch nodedig Dinas Diwylliant y DU 2025, gan ddod yn ail i Bradford, sy’n dal teitl Dinas Diwylliant y DU 2025. Cyhoeddodd Wrecsam yn fuan ar ôl colli ein bwriad i wneud cais am wobr 2029 a fyddai’n golygu y bydd rhaglen blwyddyn o hyd o ddigwyddiadau diwylliannol yn cael ei chynnal yn y Fwrdeistref Sirol.

Mae cais Wrecsam ar gyfer Dinas Diwylliant 2029 yn cwmpasu’r sir gyfan, nid canol y ddinas yn unig, a byddai ennill y gystadleuaeth yn gyfle unwaith mewn oes ar gyfer newid trawsnewidiol, gan ddod â buddsoddiad, swyddi, balchder a chynulleidfa ryngwladol i Wrecsam yn ystod blwyddyn o ddiwylliant yn 2029 a thu hwnt. Cynhaliodd Coventry dros 700 o ddigwyddiadau yn ystod eu blwyddyn o ddiwylliant yn 2021 a derbyniodd fuddsoddiad i’r swm o tua £230m. Cyhoeddir Dinas Diwylliant newydd y DU bob 4 blynedd, a chredwn mai 2029 yw cyfle Wrecsam i gynnal y teitl mawreddog hwn a thynnu sylw at ein diwylliant unigryw.

Mae Cyngor Bwrdeistref Sirol Wrecsam yn gweithio i ddatblygu seilwaith, sefydlu cysylltiadau allweddol a buddsoddi mewn prosiectau sydd ag arwyddocâd lleol, gan gynnwys gweithio gyda Chlwb Pêl-droed Wrecsam i ddatblygu Maes y Cae Ras, adnewyddu marchnadoedd treftadaeth Wrecsam, creu Amgueddfa Bêl-droed newydd sbon i Gymru, rhaglen ddigwyddiadau ar raddfa fawr gynyddol ar draws y Fwrdeistref Sirol a sefydlu Llwybr Celf Gyhoeddus Wrecsam.

Mae Ymddiriedolaeth Gymunedol a Diwylliant Wrecsam bellach wedi’i sefydlu i arwain ar y cais Dinas Diwylliant y DU, sy’n cynnwys ystod amrywiol o unigolion sydd â’r sgiliau angenrheidiol i ddatblygu a meithrin potensial diwylliannol Wrecsam ymhellach, gan roi gwerthoedd cymunedol wrth wraidd y sefydliad i sicrhau ein bod yn parhau i ddefnyddio diwylliant er budd pawb. Mae arweinwyr diwylliannol a chymunedol o ardal Wrecsam a ledled Cymru yn eistedd ar Fwrdd Ymddiriedolwyr YGDW i arwain ei weledigaeth i feithrin potensial creadigol Wrecsam a chyflawni ei chenhadaeth i bweru ecosystem ddiwylliannol Wrecsam drwy gydlynu, cysylltu, hyrwyddo a buddsoddi yn bobl unigryw, amrywiol Wrecsam.

Rhagwelir y bydd y broses ymgeisio ar gyfer y gystadleuaeth yn agor yn ddiweddarach eleni, a bydd Wrecsam yn barod i ddangos pam ein bod yn enillwyr teilwng!

Eisiau cymryd rhan? Cysylltwch â’r tîm heddiw drwy e-bost ar cyswllt@wrecsam2029.cymru.